Бл(а)гочъстивно что и sѣло прїетно и похвално въсѣмь хр(и)столюбивыим ц(а)ремь еже любити и желанїе тепло имѣти къ с(вѧ)тыим и б(о)ж(е)ств(ь)ныимь црквамь, въ них'же ѡбразь б(ог)а и чл(овѣ)ка и с(вѧ)тыих его написает се. Украшает бо сѧ ц(а)рь дїадимоѧ и каменїемь и бисрѡмь мнѡгоцѣнныимъ, нѫ и еже къ б(ог)оу бл(а)гочъстїемь и вѣроѧ, и къ с(вѧ)тыимь его црквамь чъстїѧ. Тѣмже и ц(а)рство ми помазанїемь ѡт б(ог)а и агг(е)ловѡм прѣданїемь бл(а)гочъстивна хрїстїан'ства стола с(вѧ)топочившїихь ц(а)реи и любовь теплѫѧ къ б(ог)оу, и чъсть къ с(вѧ)тыимь его црквамь, и б(о)ж(е)ств(ь)номоу ѡбразоу его и къ вьсѣмь с(вѧ)тыим его, нѫ и паче ради обновленїа и помѣна и зад(оу)шїа с(вѧ)топочившїихь ц(а)реи прьвопрѣстолныихь стола блъгар'скаго: того ради и ц(а)рство ми ономоу законоу и прѣданїоу навыкь, и бл(а)гоизволи ц(а)рство ми даровати бл(а)гоѡбразное и въсенастоѧщее сїе златопечатлѣнное слѡво ц(а)рства ми монастирю ц(а)рства ми с(вѧ)т(о)моу ѡ(т)цоу Iѡ(аноу) Рыл'скомоу, иже ес(т) въ мѣстѣ рекомѣм Рыла, за въсѣ еговѫ села и за въсе его метѡхїе и за въсе его стаси и правины, рекше новаа и ветхаа.

~~~Се же сѫт села с(вѧ)т(а)го ѡ(т)ца Iѡ(ана) Рылскаго: селища Варвара · Чрътовь доль · Крьчино · Блъгарино · Бъдино ·Дриска, и Гагань, еже ес(т) дѣль · Ѡрлица, метѡхь монастир'скыи до Броуждима, та на ѡбрьш Броуждима и на ѡбрьш Лохотици, и низ Лохотицѫ въ Рылѫ, и прѣз Рылѫ въз дѣлъ на Марешицѫ, та на Боудоурицѫ, та на Каменицѫ, и низ Каменицѫ въ Рылѫ, и въз Рылѫ оу Броуждимь. Къ семоу же еще и ѡт десные страны Ц(а)рева вира сѫщаа, на Б(о)городичинѫ цркѡвь, та на с(вѧ)т(а)го Прокѡпїа на Каменоу, и низ Рылѫ до Варварѫ, та на с(вѧ)т(а)го Илїѫ, та на Габровець и по оубрѣжїи на с(вѧ)т(а)го Геѡргїа и на с(вѧ)т(а)го ѧрхагг(е)ла, та на Дрискѫ, и до града пакы выше Ц(а)рева вира, нивїа и лозїа монастир'скаа сѫт. Нѫ и Ломнїца къ семоу с Кроушевицом' же и ѧрмѣницѡм, яже сѫт выше села Пьстры въз Рылѫ нивїе сѫще и то монастир'ско въсе ес(т). Таже село Бъзово · село Дебрь · Абланово · Пъстра · село Гнидѡбрадско · и Разлошкы п(о)пове · село Лѣшко · село Селище · село Дрѣновь доль · и градище Церово · село Долѣне · село Градечница съ людми по именю попь Тоудѡрь съ дѣтми моу и съ родом' моу, и Петрь Qеѡдосовь съ братїами си, и въсѧ правины мѣста того. И планина Срѣднѣа, ѡтгде Рыла истичет, на Зланоу, та на Лѣпшорь, тако и съ рѣкѡмь Илїинѡм догде се с Рылѡм състает, и ѡт Лѣпшора на Комарев'скыи врьх, та на Камень врьхь, та на Ц(а)ревь врьх, та на Шипочен, на метох монастирскы, и ѡ деснѫѧ странѫ града Стѡба въ Рылѫ, и низ Рылѫ въ Строумѫ, и въз Строумѫ до Германщицѫ, и въз Германщицѫ до Блъгарина, и въз Блъгарина, та на Песїи прѣскокь, и на Агоуповы клѣти, и на Шаакь, и на Рыбное езерѡ, и на Прекоуковицѫ, та на ѡбрьш Рылѫ пакы. И над тѣмь въсѣмь да имат власть неѡтемнѫѧ тои поустыни житель Iѡ(ан) Рылскыи іавленїем таковаго златопечатлѣннаг(о) слѡва ц(а)рства ми.

~~~И еще ж(е) къ симь и где же се находѧт селища, или сѣнокоси, или жрън'кы, или мѣста жрън'чана, или ловища, или виногради, или нивы, или стаси какови либѡ, иже сѫть тѣхь селищь, и тѣхь людїи, идеже се находѧт под ѡбластїю того монастирѣ ц(а)рства ми: над въсѣм тѣм да имать власть неѡтемнѫѧ тои монастирь ц(а)рства ми с(вѧ)тыи Iѡ(ан). И пращает и освобаждаеть ц(а)рство ми люди въсе и села въсѣ того монастирѣ ц(а)рства ми чистїим и свѣтлыим прощенїем - да имь не смѣѧть забавлѣти, иже сѫт севасти, и прахтѡри, и примикюри, и алагатори, ни сѫдїе, потѡм ни пер'пираке, ни житаре, ни винаре, ни дес(ѧ)ткаре пчелнїи и свиннїи и ѡвчїи, ни аподохатори, ни (коми)си, ни стратори, ни сѣнаре, ни митаты, ни крагоуарѧ же, ни песьаци, ни градаре, ни вар'ничїе и побир'чїе и находници, ни инь никто ѡт въсѣхъ болѣрь и работникь ц(а)рства ми, великыхь и малых, иже сѫт на въсѣ врѣмена посилаеми о въсѣчьскых данех и работах ц(а)рства ми. Никто ѡт таковых да не смѣетъ забавити тѣмь людем' с(вѧ)т(а)го ѡ(т)ца ни на нивїе ихь, иже имѧть на поли и иже въ горахь, ни чл(овѣ)ка его поети на работѫ, ни работникы ихь, ни имь зев'гаре ен'гарепсати то ни конѣ, ни скотинѫ.

~~~Такожде и еще къ сим' никто ѡт таковыих да не смѣеть насилїѡм вълѣсти въ села и въ люди того монастирѣ ц(а)рства ми с(вѧ)т(а)го ѡ(т)ца, насилїѡм хлѣба възѧти, ни кѹрета оубити, ни ногоѧ бъхма стати на дворѣ ихь, нѫ въси да ѡтгоними бываѫт и да ѡтстоѧть далече явленїемь сего златопечатлѣннаго слова ц(а)рства ми. Такожде и градь Стѡбь никакоже да не имать ѡбласти над чл(овѣ)кѡм монастир'скыим, ни над стасиѧ ихь, ни до единого власа. И еще къ симь, аще кто начьнет ѡт людеи монастир'скыих ходити с кѹпїѫ з добиткѡм своим по въсеи дрьжавѣ и ѡбласти ц(а)рства моего, да коуповаѧт и да продаваѫт свободно и ничимь забавлѣеми явленїем таковаго златопечатлѣннаго слова ц(а)рства ми, а да им се не възимать кѹмер'кь, ни дїавато, то ни ино нищо. И еще же къ симь, аще каковаа рикось дѣет сѧ въ ѡбласти монастир'скои, тои монастирь ц(а)рства ми с(вѧ)тыи ѡт(ь)ць, въсе съ исправленїемь да възимает, а инь никто ѡт таковыих да не имать ѡбласти и еже тварико възѧти ·

~~~И тако да прѣбывает тои монастирь ц(а)рства ми с(вѧ)тыи Iѡ(ан) поустынныи житель съ вьсѣм своимь достоанїемь, елико выше рѣхѡм, свободно и ничимь забавлѣеми, дондеже сл(ъ)нце на земѧ сїаеть, и до живота ц(а)рства ми. Понеже ц(а)рство ми, видѣвь сиковѫѧ оустроенѫѧ красѡтѫ и свободѫ чистѫ томоу монастирю ц(а)рства ми и въсего емоу достоанїоу ѡт прѣдѣдовь и дѣдовь и родителеи ц(а)рства ми - с(вѧ)топочившаго ц(а)рѣ ѧсѣнѣ и Калимана ц(а)рѣ - ѡт въсѣхь ц(а)реи блъгар'скыих, прѣдѣдовь и дѣдовь и родителеи ц(а)рства ми. И сиковѫѧ свободѫ видѣвь ц(а)рство ми и въдахь томоу монастирю ц(а)рства ми бл(а)гоѡбразное и въсенастоѧщее сїе златопечатлѣнное слово, якоже прїидошѫ людїе монастирѣ того въ земѧ ц(а)рства ми въ Срѣдець, да имь не имать никто посилити ни о единѡмъ власѣ, тъкмо да сѫ свободни по ѡризмоу ц(а)рства ми за въсѧ емоу правины и за въсѣко его достоанїе, рекше новаа и ветхаа, съ вьсѣмь своимь достоанїемь да прѣбываеть свободне и ничим забавлѣемь. Ѡбаче же и по съмрьти ц(а)рства ми кого изволить г(оспод)ь б(ог)ь ц(а)рь вѣчныи и посадить на прѣстолѣ моемь, или прѣвъзлюбленыи с(ы)нь ц(а)рства ми, или ѡт братеи и съродникь ц(а)рства ми, то да не пооучит сѧ оуѧти что или пороушити и попрати сиково дарованїе ц(а)рства ми, нѫ паче да понавлѣеть и потвръждаеть и придаваеть, якоже ес(т) лѣпо православныимь ц(а)ремь творити. Кто ли сѧ покѹсить ѡт таковыихь и пороушить и пометнеть сїе златопечатлѣнное слѡво ц(а)рства ми, и ѹиметь что ѡт зде въписаныихь, и начьнеть забавлѣти людемь того поустыннаго ѡ(т)ца Iѡ(ана) Рылскаго, то таковаго да искоусить г(оспод)ь б(ог)ь праведным своимь сѫдѡмь, и причѧстїе да имать съ Iюдоѫ прѣдателемь г(оспод)нимь, и проказѫ Гїезiевѫ да наслѣдоуеть, и съпостата да имать с(вѧ)т(а)го ѡ(т)ца зде и въ бѫдщемь вѣцѣ. ѧминь.

~~~Того бѡ ради дарова сѧ томѹ монастирю ц(а)рства ми бл(а)гоѡбразное и въсенастоѧщее сїе златопечатлѣнное слѡво ц(а)рства ми на въсѣкое оутврьжденїе извѣсто и свободѫ чистѫ.

~~~Писа и подписа ц(а)рство ми ѡбычныимь ц(а)рскыимь знаменїемъ въ лѣт(о) SѠПЗ, ен'дїкта В, м(е)с(ѧ)ца сеп(тем'врїа) КА д(ь)нъ :~

~~~+ IѠ ШИШМАНЬ В ХА БА БЛГОВѣРНЬIИ ЦРЬ И САМОДРЬЖЕЦЬ ВЪСѢМ БЛЬГАРОМЬ И ГРЬКОМЬ :~