Понѥже Лоука бож`ствныи еуаггелисть словѡ Божиѥ прописа глаголѥ: „Просите и дасть (се) вамь, иштете и ѡбрѣштете, всак` бо просеи приѥмлѥть, иштеи ѡбрѣтаеть и тлькоуштомоу ѡтьврьзоут` се“, и слово то оуспоменоувь кралѥвьство ми, бихь рев`ностию божию распалιаемь и благодатию светагѡ доуха оукрѣплιаемь и благооуср`диѥмь поспѣшьнь. ІАкоже бо светыи и православ`оыи испрьва бив`шιи цариѥ грьч`сции и бльгар`сции, ѡбаче и кралиѥ срьб`скыѥ землѥ, многооусрьд`ноую люб`вь и попечениѥ имоуште кь светыимь и бож`ст`вныимь црьквамь, також`де и кралѥвьство ми ѡнѣмь правовѣр`нимь и светыимь царемь и кралѥмь прѣж`де мене бывшїимь ревноуе порев`новахь, распалιаѥм` же бнвь бож`ст`вною благодатїю прилеж`но спѣшити се и под`визати се имь, светыимь ѥго цр`квамь дари неѡскоудниѥ изливати и ѡбогаштати ихь, ѡбрѣте кралевьство ми светаго и великаго мученика Христова Гѥѡргиιа прѣмо Скопию граду на Серавѣ на брьдѣ рекомѣмь Верьгинь, ѡть многь лѣть запустѣвьшу и разорена ѡть основаниιа. И кралѥвство ми малимь сьбраниѥмь обештахь се вьздвигнути и сьздати храмь ть ѡть основаниа, велика и самовластьна и самосудьна сьтворихь паче всѣхь монастирь кралевьства ми И видѣ кралѥвьство ми правила и оутвьрьждениιа, хрисѡволе светыихь и правовѣр`нихь царьь и кральь прѣжде мене бившїихь: светаго Рѡмана цара наипрьвааго к`титора светомоу мѣстоу семоу, Диѡгена цара, Петра цара, кѵр Никифора цара, и светаго кѵр` Алеѯиιа цара и светаго Сумеѡна Неманѥ, Асана цара, Ватаца цара, Калимана цара, Стѣфана Прьвѡвѣнчанаго Кралιа, Костан`тина цара, и родителιа кралѥвьства ми крала Оурѡша Прьваго, и кур` Ан`дроника цара Палеѡлога Вьтораго. Тѣхь всѣхь исправлѥниιа и оутврьждениιа и хрїсовоуле ихь проч`ть, любьз`но кралѥвьство ми исправивь и крѣп`чаишеѥ оутврьдихь, паче всѣхь царьь и кральь вишеписан`нихь и сь помоштию светаго того ѡбновихь и сьздахь и ѡть ѡснованиа вьздвигохь и прославихь вь помень вѣчьни кралевьства ми. Сьтворихь иже обрѣте эаписано у хрисовулѣхь светьиь и правовѣрнихь царь и краль више писаньнихь, и паче исправи кралѥвьство ми елико могохь, потврьдивь и записахь вѣчьно иже приложише светому храму сему. И кто се обрѣтають у Скопи граду людиѥ светаго и великославнаго мученика Христова Гѥѡргиιа Горьга, да не работають у царину никою работу. И да не имають власть надь ними ни севасть, ни прахторь, ни кастрофилаксь, ни кнезь, ни кто од владуштихь у кралѥвьства ми. Града не зидати ни блюсти. Писа не дати, димнине. ѡброка не дати апоклисиιару, ни севасту, ни прах`тору, ни кнезу, ни кастрофилаксу, ни аподохатору ни гѥракару, ни конюху, ни п`сару, ни коѥму кѥфалии кралѥвьства ми, ѡть великихь и до малихь власти. Ни намет`ка жит`на, ни вина, ни меснога, ни сир`нога, ни приселице плакιати, ни тьмнице блюсти, ни гласа носити, ни провода, ни чловѣка гареп`сати, ни конιа ни вола ни ѡсла, ни царину плакιати. Ни пот`коу да узима на нѥмь никии владал`ць, ни удава, опаданиѥ прѣдь владал`цы, ни роукоу, ни печати, ни ѡтьбои, ни прѣстоιа, нь всаку глобу да узима црьквь – малу и велику. И никто да не суди човѣку светаго Гѥѡргиιа Гор`га и Побѣдонос`ца вь бранехь ѡть власти више писанихь, ни да га свеже безь игуменова суда. Такожде же и по всѣхь селѣхь светаго Гѥѡргиιа Гор`га што приложише свети цариѥ и кралѥ више писани. Кто ли се нагѥ судивь чловѣку светаго Гѥѡрьгиιа, или га свезавь, или на работу изгнавь, или потьку узевь на нѥмь, или руку или печать, или ѡтьбои, или волѡберьштину, или приселицу или димнину, или кою любо приплату или оправу, да му ѥ мьст`никь Богь и свети Гѥѡргиιе Гор`го и Побѣдоносьць вь бранехь, да му ѥсть вь мѣсто помошти супостать. И да ѥсть проклеть ѡть всѣхь сихь правовѣрнихь и светихь царь и краль више писанихь, и да плати у царину .с. перперь. И даде кралѥвьство ми црькви светаго Гѥѡргиιа ѡдь ливаде кралѥвства ми у Лоупоглавехь на Слатинѣ нивиιа двѣстѣ погонь до свете Троѥручице и до Гльникаше и до монопути кои греде ѡть Студеньчишть з` главе Слатине оукраи студеньца Лупоглавьскаго на блато. И да кралѥвьство ми ѡть рѣке Сливштице четврьтоу честь на потрѣбу монастиру, и бани, и надь Чел`ником` .пе. студен`ць. И коупи кралѥвство ми ѡть Костадина сына Липьсиѡтова, и ѡть Андриана сына кѵр-Ѳеодорова, и ѡть кѵра-Калиѥ, сестре Ѳеодорове, и ѡть брата ѥѥ Ѳеодора, иже имѣιаху мѣста у Скопии градѣ и вь области Скопьскои, – вь Прѣсци и вь Соушици и вь Соул`ни Долнѥмь и Горнѥмь, или вь Сопиштехь или више Вапештьца или вь Трѣсцѣ или вь Себѣмишли или вь кои любо хори Скопьскои или вь прѣдѣлѣхь скопьскихь, – или су селишта или виноградишта, или винѡгради али нивиѥ, или сѣнокоси, или су врьтове, или периволѥ или водѣничишта. Дворь вьнутрь града Скопьскога близь Скопиѡта и до Москиιа и до пути царева, нивиѥ .еι. зевгаремь вь поли Мьглавит`скомь, виноградь вь Трѣсцѣ половина, а копание .ке. мужемь; други виноградь на Прѣсчишти, копание .о.-мь мужемь, нивиѥ вь Прѣсчишти 15-мь зевгаромь, други виноградь туждере вь Прѣсчишти .ι. мужемь копаниιа, тужде и дворь и водѣничиште, и вь Себѣмишли виноградь Ан`дриιановь што любо га ѥсть. Вь Туранехь полѥ до мѣста Троѥручице Скопьскиѥ и до Кьсѣнѣ, и до протопопе Десислава и до Веришина мѣстѣ што се обрѣта Липьсиѡтыштша сь градиштемь и сь Хрьсовѣмь селиштемь – то покупи вьсе кралѥвьство ми за цѣну .т. перперь ѡсвень иномикова откупа и прочега еѯода. Купив`ше ѥ и даровахь ѥ светому Гѥѡрьгию Горьгу у помень вѣчни кралѥвьства ми. И кь тому приложи кралѥвьство ми изводе ѡть Лепеньца кои исходи на полѥ Турен`ско да си учини црькви светаго Гѥѡрьгиιа водѣницу вь краи полιа Турѣньскога вь брѣгу Великѥ рѣке, и да си вади жита и врьтове вь поли Туреньскомь. И други извѡдь да си изведе ѡдь Велике рѣке, да га узме пѡдь Турѣни вь забѣль кралѥвьства ми где може, и да га проведе прѣзь забѣль кралѥвства ми на полѥ Туреньско и да си положи другу водѣницу на брѣгу Велике рѣке. Такожде и полιёмь да се вади никимь же невьзьбранно. И купи кралѥвьство ми у граду Скопи вьнутрь града, ѡдь Николе, сына попа Димитра Девтерѣва, рьпиниѥ за цѣну .с. перперь, и ту сьздахь полату и дворь светому Геѡргию. И туге прикупихь кукю ѡть Дима сина Кон`дева за цѣну .л. перперь. И тугѣ прикупихь кукю ѡть Маноила Куклева за цѣну .к. перперь. И прида кралѥвство ми Апокавькову црьквь светаго Геѡргиιа и около нѥга 60 кукιамь рьпиниѥ ѡдь царева друма кои греде ѡдь Сераве кь светои Троѥручици усь путь кои иде кь Облои пирьзѣ до пута кои иде пѡдь Мосхемь, кои греде Куклеви и до Голька, и оште дворь Апокавьковь ѡдь Паскалιа до Холевата 25 дакть светаго Николи, и ѡдь царева пути кои греде кь Облои пирьзѣ долу до града до Капицалιа. И прида кралѥвство ми ѡдь Леуновѣхь рьпинь 2 рьпинѣ при полатѣ старои светаго Гѥоргиιа на Великихь вратехь. И оште прида кралѥвство ми ниву Левунову при воденици светаго Геѡргиιа до попове ниве и до Куклιа старога, прѣсь кою греде путь царски у Срѣшевлιане обѣстрань пута 20 погонь. И дахь врьть Леуновь подь монастиремь 7 погонь, и насели на нѥмь кралѥвство ми село светому Геѡргию. И Драгослав казньць даде ѡть тьстьнине си виноградиште Маврово у Бутели. И постави кралѥвство ми панагирь, и на семь панагири да се продаѥ црьквнѡ вино и хлѣбь и месо, а инь никто да не продаѥ безь игуменова благословлѥниιа. Кто ли се обрѣте продавь, да плати 12 перперъ и да му узме црьквь вино и хлѣбь и месо. Такожде и вь всѣхь метохиιахь Светаго Гѥѡргиιа да не метеха никто вина унести. Даде Обезова хки сь родомь си ниву ѡдь царева пута кои греде у Лупоглаве до пути кои греде и(с) Слатине у ЧрѢшево и до Мил`тѣна и до Колѣн`ца на брьдо до Вране. И другу ниву даше Обезоглавьчеви ѡть Крушице до Хрусомала. Нива у срѣдопути до студенца Лупоглав`скога. Нива у Калике у Смрьдеш`ци до Богородице Воденьске и до Пурпута, ѡть обою страну пути. Нива до Грубеши и до Тудѣ и до Климиѥ, на Прѣгари пѡдь Смрьдештцемь. Даде Роусинь нивоу више Капешца низь Милоша до поути кои греде оуз` полѥ и до вѣн`ца; нива оу разьпоути до Кремеч`ка и до Радиновикιа мегю поутиѥмь. И ѥромонахь Калоудь даде нивоу ѡб` оноу страноу Велике Рѣке до царева из`вода и до попа Хоуда, и до Радина - .н. погонь; и вь Боутелѥ виноградь до светиѥ Богородице Боутельскиѥ и до Вѣльптишта оус` поуть кои греде оу Доброушане; и дроугоу нивоу тоугере оу Боутели до свете Троѥроучице, и до Палича, и до поута .к. погонь, и дроугоу нивоу Оусране Коупине ѡб` лѣве стране до Изата .иι. погонь. Нива оу Кременчеве низь поуть кои греде оу лоугь на десно – ιи. погонь. Нива оу Боутели мегю поутьми до Агатиѥ, до врьхь брьда. Нива оу Рекоми до стоуденца и до Чюрка междоу поути. Нива подь Коуманьскимь бродомь до Коуклѣ што ю Велика разби, и до Стана дромахара и до Миха златара. Нива на Медьвѣдци .ι. погонь: до Коуклιанина, и до Пшинιанина, и до Зѣнка, и до поути кои греде оу каменикь. Нива ѡть поути кои греде прѣзь Клетовникь, и долоу до поути кои греде у Каменикь, и до Пшинина (?). И на Серавѣ врьть даше ѡбезоглавчеви прѣма светимь Николѥмь (?) погонь мѣста. Дворь подь градомь при Михови златароу оу мегюпоути .ι. рьпинь. И да кралевьство ми рьпиноу конь ѡбле пирге, ѡть пирге до пирге, низь зьдь градьски ѡбь долнѥ стране. Нива светаго Геѡргиιа ѡть поути кои оулази оу Ралицоу, та на брадо (!) до Светыхь Врачеи и до Мароуце. Дроуга нива оу іазвине ко(ιа) иде оу Лоупоглаве, ѡдь нѥѥ гребенароу Тоудичиштоу третиιа честь, до Радина и до Мавровштине. Нива оу Бѣлевѣ: ѡть Пикрида долоу нис` поуть до Лоуке и до Ватамоуна - .еι. погонь. Нива оу Бѣле(вѣ): ѡдь Троѥроучице до поута кои иде у Лисиче и дѡ Панделеимѡна. Нива оу Срѣдорѣцѣ до Могиле, и до попа Хоуда, и до ниве Левоунове. Нива на Лоукашевѣ: ѡдь царева поути кои греде кь светомоу Ѳеѡдѡроу, до Радина, и до Гребеше, и до рѣке Велике, и до Прокопиιа, и до Баха златара. И даде Каломень за гробь свои црьквь светаго Илию сь нивомь ѡдь поути цар`скога (!) кои греде мимо Светы Ѳеѡдѡрь и до горнѥго поути кои иде прѣзь брьдо до наротиιа поутма, и ѡбь сиѥ стране брьда до кроуше горнице и до смокве, та долоу до поути до водоважде. И на тои нивѣ кто копа глину грьнцемь, да си узима црьква свети Геѡргиѥ грьнце што ѥ на потребу. И ѡбь сиѥ стране Клетовника нива: ѡть водоважде оуспоуть до Маврѣιа, и до вѣнца брьдоу, и до Братоуна. Тоугере нива до Коук`лιа и до светаго Димитриιа, ѡть поути велиѥга кои греде оу Чрѣшевѡ. Воденица светаго Геѡргиιа Герасимица, а више нѥ нива оуз`рѣке Сераве до попа Баіа и до Влькаса, и ѡть попа Ваιа до водѣнице; тако и ѡдь мѣста моу што ѥ ѡколо водѣнице, все половина. И хариза кралѥвьствоу ми Прокопиѥ половиноу водѣницоу на Серавѣ, и дахь ю светомоу Геѡргию. И при монастири светаго Геѡргиιа врьть .з. погонь ѡть поути ѡть светаго Прокопиιа до Стоуденца Фроушкога и до Пшинιанина. З` дроуге стране монастира нива ѡть цркве светаго Прокопиιа до Калиге и до Потѣ и до поути. А више нѥ нива дроуга ѡть поути до епискоупа и до светаго Аѳанасиιа, а оу нѥ и банιа, та до Влькаса и до свете Петке и до свете Троѥроучице. .Нива надь Боутелемь оу срѣдопоути, кои греде поуть на Блатце, а дроуги оу Боутель, до вѣнца, до Радомиричишта, и до попа Косте. И приложи кралѥвство ми село Козаревѡ, прѣжде приложеноѥ Диѡгенѡмь царемь, а вь нѥмь монастирь светы Иѡань Златоустыи и сь Баровомь и сь Винскомь и сь всѣми засѣлки тѣми и сь Златоустьчани, сь виногради, сь нивиѥмь, сь водѣничиѥмь и сь ловиштемь рибнимь и сь звѣрнимь, сь забѣли и сь планиномь и сь всѣми правинами сель тѣхь. Село Чрешевлιани: ѡбрѣте бо ѥ кралѥвство ми ѡть исьпрва бившеѥ светаго Геѡргιа Горга, даноѥ светымь Романѡмь царемь, сь виногради, сь нивиѥмь, сь млини, сь сѣнокоси, сь пашишти, сь забѣли, сь ловиштемь звѣринимь, сь планиномь и сь всѣми правинами. А меге чрешевске починають: ѡть Чрьне Горе како слази долць на Дльбицоу, на Могилоу, та на Мраморь; и ѡть Мрамора до Крьста, та низь дѣль на боутел`ски поуть, ѡть боутелскаго поути прѣзь Кавиιаново Брьдо, како греде поут к` Ралици на висоу, ставь на Поудинѣ, на цѣстоу коιа греде на Левоуново село и ѡть Левоунова села на Бѣли Ками, ѡт Бѣлога Кам`не оуз` дѣль на Дльгоу Полѣноу, та над Светоую Богородицоу Чрьногор`скоу до Чрьнога Камене. И тако дарова кралѥвство ми Чрешевлιане светому Геѡргию Горгу и записахь у сии хрисовуль сь великимь утврьждениемь. Что се обрѣтаеть вьнутрь меге више писане, или чиιа годе буде баштина, или куплѥница, или виноградь, или млинь, или нива, или сѣнокось, или периволь, или врьть, или водоваге, кто нѣсть отьприль при игуменѣ Исацѣ и узель при архимоудритѣ Никодимѣ, по ошьсти Никодимовѣ никто да не узиштеть Црькви светаго Геѡргиιа ни игумень настоѥштиихь, ни о баштинѣ ни о куплѥници, ни у нивахь, ни у виноградѣхь, ни у млиништѣхь, ни у водовагιахь, ни о людехь, ни у комь любо дльгу бивьшимь до Никодимова одшьствиιа. Кто ли се обрете вьзискавь или баштину, или куплѥницу, или ниву, или виноградь, или млинь, или сѣнокось, или водовагѥ или ино что, да плати у царину .ф. перперь. И вода црьковна да се не изводить изь мегѥ Чрѣшевьске и ни у коѥи метохии, ни у коѥмь селѣ светаго Геѡргиιа ни на кою потрѣбу кралѥвства ми ни инимь господьствуюштимь по кралѥвству ми. И вьзбранιаѥи водѣ тешти на црьковну землю, идѣже ѥсть и ѡть испрьва текла законнаιа вода, да плати потку севасту .вι. перперь. Вѡдно село прида кралѥвство ми, и вь нѥмь монастирь светаιа Богородица Ѥлеуса сь светымь Ѳеѡдѡромь надь Водномь и сь светымь Панделеимономь и сь светымь Ѳеодоромь иже ѥсть вь Хваштихь, ѥдно бо ѥсть село Водно и Нерѣзи, сь виногради, сь нивиѥмь, сь водѣничиѥмь, сь сѣнокоси, сь ловишти звѣрними и сь рибними, сь забѣли и сь всѣми правинами ихь. А меге водьньске ѡдь водѣнице вистиιаритове Коутревице, та на Мраморь подь вись, та поутемь кои греде на Чрьнче, та на Чрьнче, на Крьстилинь Доль, та оуз` Дѣль до Камнѣ Велиѥга, прѣма Чрьвенои Прьсти, та оуз` Вели Дѣль на Стежерно, на Градиште, на Крьстофорь, та на Ѳеѡфиловь Камень, та по хридоу на распоутиѥ баровьско, на поуть ко(и) иде кь Жоужлю, та низь Доль Ананзевь на Кроушопеке, та низь Крабоулинь Доль на Хваште, та прѣз` рѣкоу на протопопе Десисава нивоу, на тоурѣнски поуть кои греде ис` Полога, та на Троѥроучицоу, на кроушоу Пасхалевоу, та на Москоιаницоу на Стоуденои, та на Драгиѥвь лоугь, на Вихендѣ, та на Веришино селиште на Стоудньць, нис` поуть на Зоричиноу водѣницоу, на Бабинь Вирь, та на Оусраноу Коупиноу, на Прокопиιа. И нива кою ѥ даль Коста Лютовои оу Зиιашти на Прѣсчишти льништа .ПЕ. погонь; даде ю за гробь си црькви Матере Божиѥ Воденске: ѡть батинске водовагѥ, та нись поуть кои иде оу Драчево до рѣке Прѣсьчке, сь лоукѡмь. Црьквь подь градомь Свети Геѡргиѥ вь пештерѣ Церебоульскои сь виногради, сь нивиѥмь, сь млини; а мегιа ѥ е ѡть пирге коιа ѥ подь коулоумь(!) на рѣцѣ, та долоу до Пирге Водѣне, такои и с` рѣкомь, и горѣ до пирге поредь Водѣнихь врать, та низь зьдь градни коулѣ. И црьквь светаιа Марина више града, сь водѣницомь и с` мѣстомь ѡть рѣке Сливштице по водоваги коιа иде на баню, та на поуть вели кои иде оу Чрѣшево. Дроуга нива нис` поуть кои греде прѣс` Челникь оу Чрьноу Гороу, до рѣке Сераве, и до водоваге, и до горнѥ водоваге. Нива оу Веришинѣ поли до Москоιанιа, до Колѣнца, и до Моужила, до водоваге. Нива оу Добромь Долѣ до Паскалѣ и до Оушоу, оус` поуть кои греде оу Попоуждоу оуз` Добри Доль – .П. погонь. Нива Акрополитова нис` поуть кои греде на градь Чрьнче до протопопе Десисава на Подоу. Нива оу Брѣста нись Килавца, и до поута, и до Станислава. Нива под` Чрьнчемь близь Тихомира макелара до Рада Трьпезице и до поута кои греде оу селиште. Нива оу Побоужди при виноградѣхь, садовна, до рѣке побоушске. Нива виоградиште вь Тоуричевѣ Долѣ ѡдь рѣке мегю виногради и мегю Витаномь, та горѣ на брѣгь на Гомрадоу(!) – .ι. погонь. Нивоу даде Вогдаиь макеларь оу Карачинѣ брѣгоу низь виноградь си .д. погони. И Калоудева мѣста што любо се ѡбрѣтаю оу Скопии градоу и изьвнь града – и нивиѥ, и врьтове, и гоумна (вь) ѡбласти Скопьскои – все то да кралѥвьство ми црькви светаго Георгиιа. Соулнѥ – Пасереловоу еѯалимоу и Илиасовоу и Ананзевоу – прида кралѥвьство ми сь нивиѥмь, сь пашишти: поѥмше ѡть Почивала поутемь на десно междоу обѣ Соулни, на Доупни Камень, та на поуть, на хридь до Панделеимонове меге по брьдоу кь дрьстилиштемь, та на Голо Брьдо, ѥднако нись хридь кь Стежерноу мегю ѡба дола, та на бароу, та на вели доубь колникомь на Мрамориѥ, та на Прогово селиште, на стари поуть на лѣвоу страноу, на гоумништа, та нис` хридь на Порѡдимь, на поуть та поутемь на Самовилски Стоуденець, на Квочиловь виноград поутемь, та на Почивало; и планина их Горнιа Лисичишта и Долнιа Лисичишта, и Заѥчица Горнιа и Долнιа; и еѯалимоу попа Квочила близь мѣста Оутѣшенова и до мѣста коѥ коупи кралѥвьство ми ѡть Моужила златара. И прѣдь полатомь пиргь Хрьптати да ѥсть сокница светаго Геѡргиιа Горга и Побѣдоносца вь бранехь. И надь Тоурѣнскимь Полѥмь нива Ананзева еѯалима, .реι. погонь; и на тои нивѣ водѣница – и то да кралѥвьство ми црькви Светаго Геѡргиιа. И еште нива на Лепенци стара Светаго Геѡргиιа црьквна близь Жегра .рк. погонь. И ѥште прида кралѥвство ми Верихино мѣсто и Драгиѥвь лугь: изневѣри бо се Вериха кралѥвству ми и побѣже кь севастократору Калоιаню Синадину. Да што се ѡбрѣта Верихево гдѣ любо, дахь ѥ црькви светаго Гѥѡргиιа. Селиште Дубница сь всѣми правинами ѥго, и селиште Ракита сь всѣми правинами ѥго. И кто се ѡбрѣтаю туги людиѥ а не црьквни сѣдеште на селиштихь светаго Геѡргиιа, да даю црькви ѡть жита четврьто а ѡть улишть десето, а ѡть свинь десето, и да ору црькви дьнь бѣдбе и да жню дьнь и да косе дьнь. Село Калоугеровлιане надь Пшиномь сь заселки ѥго – Калништа и Драгининь Доль с` Трѣбоушомь и с` Тополовомь – с` виногради, и с` нивиѥмь, сь ливадами, сь забѣли польскыми и доубравними, и сь всѣми правинами ихь. А меге села того починають ѡть поути старого велиѥга кои греде ѡть Церова на Кострешь, та на мостьць, та на стоуденьць оу Габра, та поутемь подь малоу Мокроу Полоу, на стоуденьць подь Дивлѥ, та на Мартинь крьсть, низ Вели Дѣль на поуть кои греде на Паинь Доль, та по Велиимь Дѣлоу кои спада надь Кроушицоу, та на поуть кои греде кь Драгининоу крьстоу и на Лопоуш`нь, на Гльбоки Доль, та на Бабиштки Дѣль како испада поуть кои греде на локвоу, та на поуть кои греде ис` Церова, мегю Смрьдештецемь(!) и мегю Калишти до црькве светаго Петра, та оуз` Вели Дѣль кои греде на Чрьнешево, та на мраморѣни кьб`ль, та низь дѣль на вели поуть церов`ски кои излази подь Кострешь. Село вь ѡбласти Положькои Рѣчице сь Поповлιани, ѥже ѥсть приложиль светы Романь царь, прьви ктиторь. И видѣ кралѥвство ми ιако подано ѥсть светымь Романомь царемь и светимь кѵрь-Алеѯиемь царемь, и записано и утврьждено кѵрь-Маноилемь царемь, кѵрь-Асаномь царемь и светыми и правовѣрними цари и крали више писаними, и освобождено ѡть всѣхь работь царьскихь и ѡть всѣхь поданькь малихь и великихь. По томужде образу и кралѥвство ми освободи село Рѣчице ѡть всѣхь работь царскыхь и ѡть всѣхь поданькь, малихь и великихь. И кому се дасть жупа Положька на дрьжаву милостию кралѥвства ми, Рѣчицамь да не има заповѣдати ни на ѥдну работу, ни на воиску поити, града не зидати ни блюсти, винограда не копати, ни гласа носити, ни провода, ни поноса. И да нѣма улѣсти у село то Рѣчице никои владалць кралѥвства ми ни владалць дрьжештаго жупу ту, ни узети коѥга доходка ни мала ни велика, ни севасть, ни прахторь, ни кнезь, ни винарь, ни позобь, ни конюхь, ни письць, ни геракарь, ни пьсь хранити, ни десетка пчелна, ни овчега, ни житнога, ни виннога, ни травнине, ни торовнине, ни комота, ни митате, ни кошарьштине, ни писа, ни димнине, ни волоберштине платити, ни приселице, ни наметькь житни, на винни, ни чловѣка гарепсати, ни конιа, ни вола, ни осла, ни царину да дають, ни судити чловѣку светаго Геѡргиιа посилиѥмь, ни потку да узима на немь, ни руку ни одбои, ни кою глобу или потьку или руку, и всаки бирькь законны да узима црьквь. Сие записаниѥ и утврьждениѥ обрѣте кралѥвство ми вь хрисовулехь светихь правовѣрнихь царь и краль. Такожде и кралѥвство ми по томужде образу потврьдихь записаниιа и хрисовуле, да си дрьжи село Рѣчице с` виногради, с` перьволи, с` нивиѥмь, с` млини, сь сѣнокоси, сь забѣли и сь планиномь и сь всѣми правинами села того. А меге рѣчичке починають ѡть извора Рѣчичке Рѣке на десно оуз` доль прѣко брьда на ѡсльникь, ѡть ѡсльника оу Нановь Доль, та подь Чрьвчишта, та междоу Прѣслопь и междоу ѡгражденикь, прѣко брьда на изворь Па(л)чиштке Рѣке и низь рѣкоу до Катафигιа, тере оузь брьдо на краиште Лисьчько, право низь гвоздь на стоудьн`ць, та на Гльбокы Доль и ѡть Гльбокога Дола ѡбь десне стране колника, и ѡть вечернѥ стране прѣзь лоугь прѣко оу Великоу Рекоу и низь Великоу Рѣкоу до Хтѣтовьске бразде, и ѡтьтоудоу право на Точиль кои слази надь Лѣсковиιани, тере оуз` брьдо до г(ор)а на десно и поутемь оузь гвоздь кои оусходи на планиноу по краиштоу низ гвоздь на Рѣчичкоу Рѣкоу до извора Рѣчичке Рѣке. Того ради кралѥвство ми потврьдивь и утврьдихь вса сии, понѥже кралѥвство ми сьзда ту црьквь вь име чьстьноѥ светаго Геѡргиιа Горга и сь помоштию светаго того обрѣтохь се хтиторь мѣсту тому. И Драготино мѣсто у Рѣчицахь обрѣте се царска прониιа, а не баштина Драготина. И даде ѥ кралѥвство ми црькви. И того ради Манота зеть Драготинь, видѣвь ере отьступи ѡть нѥго тьстна прикиιа, и прѣдаде се црькви да си дрьжи тьстнину и да работа црькви у воиничьски законь, да му се конь не товари и товара да не води. Ако ли Манота и егова дѣца и унучиѥ отьступеть ѡть црькве, да су лиси Драготина мѣста, да си га дрьжи црькви ιакоже га и обрѣте кралѥвство ми у старихь хрисовулѣхь царьске прониѥ, а не Драготину баштину. И Калогѡрьгиιа з` дѣтию и сь баштиномь ихь да кралевство ми црькви, да работають светому Геѡргню у воиничьскы законь, а да имь се конь не товари ни товара да воде. И сыедини кралѥвство ми село Рѣчице сь всѣми стасми, да га дрьжи свети Геѡргиѥ безь изма, а ѡт` селѣ и до вѣка да не улѣзе имь прониιарь у Рѣчице развѣ свети Геѡргиѥ. И у Рѣчицахь ексоприка да нѣсть, ни да се прода нива ни виноградь изьвьнь. Кто ли се обрѣте у Рѣчицахь ексоприкисавь или продавь ниву или виноградь изьвьнь, ѡно продаѥмо и ексоприкисано да се узмѥ црькви. И продаѥи и ексоприкисаѥи да плакιа потку црькви .вι. перперь. Такожде и по всѣхь селѣхь црьквнихь во Воднѣ и вь Нерѣзихь, понѥже црьквна прониιа ѥсть, а не ничиιа баштина. И вь ѡбласти Порѣчкои село Кроупа Власи, а вь нѥмь црьквь Спась ѥже приложиль светы Романь царь прьви ктиторь светаго мѣста сего сь нивиѥмь, сь млини, сь забели, сь пашишти, с` ловишти, сь планинами и сь всѣми правинами села того. А меге селоу томоу ѡт` Оушча на Градиште Горнѥ, надь Драιановоу цркьвоу, надь Чрьвско Градиште, надь Радьчевь Крьсть по хридоу надь Мьхнатць; ѡть Мьхнатца вьс` хридь до Соудишта надь Тихов`ць, на Дѣдино ѡсоиѥ, на Голѥмї Камень, на Високы Кладенець, мегю ѡба Ѥлена, на Прѣслопь по хридоу гори Ѥленѥ. Село Бродь, вь нѥмь тьргь Неделιа и панагюрь .и. дьнь секьтебра иже ѥсть приложиль светы Романь царь, и вь нѥмь црьква светаа Богородица сь селомь Сланьскомь и сь Барбарасомь, сь виногради, сь нивѥмь, сь млини, сь мостнинами, сь сѣнокоси, сь пашишти, сь планиномь, сь ловишти звѣрними и рибными, сь мегιами и сь всѣми правинами сель тѣхь. А меге селоу томоу: ставши на Оушчи ѡть Кичаве на Тоудоровь Доль, та на Кривопоровоу Гомрадоу, та на изворь Копривнога Дола, на Савин`ць та на Светаго Прокопиιа, по срѣдѣ Равнець по хридоу, на Светоую Неделю, та на Светаго Архилиιа, на Крьстофорицоу, на Син`кь, на Срѣдни брѣгь, на камень на брьдѣ, на Чрьноу Трьницоу, та на Мауровь (!) Доль. Село Здуне и сь Поповлιани и сь Бльзньскомь и сь Мокросѣци ѥже ѥсть даль светы Романь царь прьви хтиторь, сь заселки тѣми сь Велимь подомь. И кралѥвьство ми ту приложи и црьквь Светую Неделю, сь виногради, сь нивиѥмь, сь млини, сь сѣнокоси, сь пашишти, сь планиномь, сь ловишти звѣрними и рибными, сь мегιами и сь всѣми правинами сель тѣхь. А се меге ихь починають ѡть црьквишть, та по билоу на Бодиново Гробьште, на Повилень, та на Гомодедь, та на Ксень, на Мравинць, та на ІАсикоу, на Добри Гвоздь, на пропасть, на Стоупишта, по билоу на Хвоинкь, по билоу на Равнѥ, та на Бѣлоутокь, на Калоугерць – Калоугерць жировиште светомоу Геѡргию – Бѣлица рибникь, та на Робинь Доль, на Синю Локвоу, на Лопоушьнь, кь ѥлѣ та на Црьквишта. Село Соушица и сь селомь и сь поповлιани, сь виногради, сь нивиѥмь, сь сѣнокоси, сь пашишти, и сь цериѥмь, сь зимовишти и сь всѣми правинами. Вь Здунтхь и вь Сушици, на броду и вь Крупѣ ѥксоприка да нѣсть, ни да се продаѥ ни виноградь ни нива извьнь никому, поиѥже вса та мѣста паричка суть светаго Геѡргиιа. Поповлιане мѣсть тѣхь да не метеха никои ѥпискупь, ни запрѣштениιа поставити, ни доходка узети развѣ архиѥпискупу помень. А ексарштину да узима црькви светаго Геѡргиιа, тако бо ѡбрѣте се писано вь хрисоволѣхь светаго Романа цара прьваго хтитора и светаго кѵр-Алеҙиιа цара втораго хтитора светаго Геѡргиιа. Аваз`говѡ подь Мороїзвиздомь, еже прида кѵрь-Маноиль царь, с` виногради, с` нивиѥм, сь сѣнокоси, с` пашишти, сь летовишти, сь зимовишти и сь млини, сь планиномь и сь всѣми правинами. Метохь свети Николаѥ вь Вельбоужди вь Колоуши, с` парики, с` виногради, с` нивиѥмь, с` водѣничиѥмь, с` ловиштемь рибнимь и сь всѣми правинами. Выюутрь града Скопиιа, при вратѣхь Великыхь, полата и цркьвь светаа Богородица, еже ѥсть придаль монахь Ксенофонть, сь млини, с` нивиѥмь, с` виногради. Водѣница подь Доушегоубицѡмь именоуѥма Вистиιаритица и на Лепѣенци водѣница, еже коупихь ѡть Чекатинице и ѡть Радѣѥве х`кере за .р. перьперь, како и сь нивиѥмь. Село Бистрица вь Бабоунѣ приданоѥ Калоιанѥмь царемь, и то дарова кралѥвьство ми Светомоу Геѡргιю с` нивиѥм`, с` водѣничиѥмь, сь сѣнокоси, сь лѣтовишти и сь зимовишти кобиламь и ѡвцамь, и сь всѣми правинами села того. Село Гостовша сь црьквомь, с` виногради, сь нивиѥмь, сь сѣнокоси, сь забѣли и сь всѣми правинами ѥго. Вь всѣхь метохиιахь где любо се обрѣтають людие светаго Геѡргиιа Горга, у коѥи любо жупѣ или граду Скопи или у коѥмь любо граду или у чиѥмь селѣ, чловѣку светаго Геѡргиιа да не суди никои владушти по дрьжавахь кралѥвства ми, ни да даѥ ѡтрока на нь: ни казньць, ни теп`чии мали, ни судиιа вели ни мали, ни севасть, ни прахторь, ни севасть градьскы ни прахторь градьскы, ни стражь граду, ни судиιа граду, ни судиιа жупски, ни кнезь жупски. И кто се нагѥ кому кривь чловѣкь светаго Геѡргиιа, да се при прѣдь игуменомь, и сь игумновѣмь ѡтрокомь да се узима кои любо дльгь. Аште ли се наиде игумень криво судивь, да изврьжеть се сана. Вь всѣхь метохиιахь светаго Геѡргиιа коιа се удава удаѥ на црьковномь чловѣцѣ или потка или ѡпаданиѥ, да не узима никои владушти кралѥвтва ми ни инихь господствуюштихь по кралѥвству ми, развѣ да си узима црьквь на свомь чловѣцѣ. Кто ли се ѡбрѣште ѡть владуштихь кралѥвства ми уземь потку или ѡпаданиιа, или удаву, илп глобу кою любо, или руку, или печать, или ѡправу, да му ѥсть свети Геѡргиѥ Горга и Побѣдоносць вь бранехь вь мѣсто помошти супостать, и да плати .р. перперь. Да нѣсть котла людемь светаго Геѡргиιа ни надьставе, ни бѣлѣга ни у комь потворѣ. Поротници да имь се не наричоуть людие кралѥвства ми ни властельсци, развѣ людиѥ црьквни. Поповлιане кои се обрѣтають вь Скопии градѣ под областию светаго Геѡргиιа, и вь селѣхь и вь всѣхь метохиιахь по духовнои области, да не метеха никои епискупь, ни доходка узети ни запрѣштениιа поставити на поповѣхь светаго Геѡргиιа, развѣ архиѥпискупу помень, а ексархато светому Геѡргию. И тизи попове да дрьже неделю у монастири редомь. Ексалима Илиасова и Ананзева, нетиιа ѥго, што любо се ѡбрѣтають или вь Винсцѣ, или вь Прѣсцѣ, или вь Горнѥмь Соулни или вь Сопиштехь, где любо се што находи, то все даровахь светомоу Геѡргию. Ексалима попа Квочила што любо се ѡбрѣта оу Горнѥмь Соулни, и то даровахь светомоу Геѡргию. Ексоприка да нѣсть у метохиιахь светаго Геѡргиιа, ни да се продаѥ изьвьнь ни виноградь ни нива. И кога си чловѣка приселиль игумень светаго Георгиιа отькуду любо: или изь Грькь или изь Срьбльь, или свободна или господита, кои ѥсть проводиль .г. годишта безь господара, или село населити, все то милостию кралѥвства ми даровахь и записахь вѣчно у крисовуль сы новы. И кто се наиде судивь чловѣку светаго Геѡргиιа посилиемь и отрока давь на нь или га плѣнивь безь игумнова суда любо га свезавь, буди на нѥмь клетвь Божиιа всѣхь правовѣрныхь светыхь царь и краль выше писанихь, и да плати у царину .р. перперь. Понеже бо всака глоба црьковна ѥсть: рука, печать, послухь, оправа, отьбои, потка, глоба шестыволна, .вι.-волна, милостию кралѥвства ми то все да ѥсть цркви, а наводьчии ништа, развѣ ѥгово лице. ѡть вражде и ѡть дѣвичега разбоιа и ѡть конскога провода глоба вса црьковна. Вражда да се не узима или у граду или у селу, развѣ на убици кто ю учини, и то судомь. Приселице да не плакιаю метохиѥ светаго Геѡргиιа ни волоберьштине. Кто ли се обрете ѡть владуштихь узьмь приселице или волоберьштине, да плати у царину .т. перперь. Даде кралѥвство ми црькви светаго Геѡргиιа селиште именуѥмо Дубравице ниже Тавора с` ловиштемь рибнымь и звѣрнымь и сь нивиѥмь; блато и доубравица Доубравице до меге светаго Димитриιа подь забѣломь, и до дроума царева кои греде на Пшиню, и до Мела, та поутемь до Дѣла, та по Дѣлоу до меге Светаго Димитриιа. И ту посадихь улиιара именемь Добрена и сь родомь, и рибара Геѡргиιа Грька и сь родомь, да ловить рибе у томь блатѣ подь Дубравицами црькви светому Геѡргию, а Добрень да рои улиѥ црьквне, а не работе кралѥвству ми. И кто улови у томь ловишти рибе или звѣре, да даѥть црькви четврьто, нь упросивь игумена. Кто ли улѣзе у ловишта таа и по всѣхь метохиιахь светаго Геѡргиιа, или рибна или звѣринιа безь игумнова благословлѥниιа, да ѥсть проклеть ѡть Господа Бога вседрьжетелιа (!) и ѡть пресветиѥ Богородице, и да моу ѥсть свети Геѡргиѥ вь мѣсто помошти соупостать зде и на Страшномь пришьстви Христовѣ и да плати оу цариноу .Н. перьперь. Н што ѥ Пасарелове коупенице оу Соушици и вь Барѡвѣ, и вь Соулии Горнѥмь, и вь Сопиштехь, и вь Кроушопецехь, или вь Скопьскои ѡбласти и вь Прѣсци еҙалимо дахь светомоу Геѡргию, и ѥсть писано ѡ том выше. И кто ниву црьквну поѡреть или врьть учинить на црьквнои земли, да даѥть црькви четврьто. Ако ли безь игумнова благословлѥниιа ниву поѡре или врьть учини на црьквнои земли, да плати у царину .вι. перперь, а врьть и жито да узме црьква. Такожде и за гумна запрѣштаѥмь, – такожде глоба .вι. перьперь, а црькви жито. И кто вади водомь коιа се изводи ѡть црьквна мѣста главе, да подасть црькви ѡть рала кьб`ль водоваштину, и ѡть врьта .в. динара. Ако ли безь игумнова благословлѥниιа поведе кто ѡть црьквне главе воду, да плати .вι. перперь у царину, а црькви двоину да дасть. Ако ли сь упросомь воду поведе а водоваштину удрьжи, да плати .г. перпере. И такожде жито црькви двоину. И кто лѣсь сѣче или дрьва у црьковномь брьдѣ, да даѥ црькви четврьто дрьво. Ако ли безь игумнова благословлѥениιа сѣче што любо, да плати .вι. перперь у царину, а црькви лѣсь вьсь да му узме. И кто ιагни на црьквнои земли, црьква да си узме торовнину на нѥмь законну. Такожде кто испланинуѥ на црьквнои планинѣ, да подаѥ црькви травнину законну. И кто свинѥ ижируѥ у црьквныхь горахь, црьква да си узима на нихь жировнину – десети бравь. Ако ли кто улѣзѣ у црьквна пашишта безь игумнова благословлѥниιа сь коимь любо добиткомь, да плати у царину .р. перперь. А ѡть тѣхь глобь црькви третиѥ. И што помре црькви добитка тои зимѣ, да все плате тизи кои буду попасли пашишта црьквна. И постави кралѥвство ми забѣль добиткомь светаго Геѡргиιа ѡть Жаблιань до Колушине Лоуке и до Воднѣнскихь и Нерѣж`кыхь виноградь, и Верихино мѣсто и Драгиѥвь лугь. И кто улѣзе у тьзи забѣль или Срьбинь, или Влахь, или Бльгаринь, да плати .р. перперь. А црькви добитькь што помре. И где се обрѣта чловѣкь црьквны и нива и виноградь и конь, и кои любо добитькь или живь или мрьтавь, да се вракιа, да му нѣѥ старине. Ако си га ѥ кто купиль ѡть кого или плѣниль у тугои земли, все да се вракιа лицемь кь црькви. А ѡни да си продавьчиѥ себѣ иштуть, а никако да нѣсть погибѣли црьковному лицу, ни ись туге землѥ да му нѣсть руке. Игумень да се не позива безь книге царьске. Апоклисиаринь да не стаѥ у манастири светаго Геѡргиιа. Ако ли кто уведе апоклисара у манастирь, да ѥсть проклеть ѡть Господа Бога Вседрьжителιа и ѡть прѣчистиѥ Богородице, и да га убиѥ светыи Геѡргнѥ и да му ѥ супрьникь зде и на страшномь судишти Христовѣ. И да плати у царину .р. перперь. Ако ли апоклисариѥ силомь улѣзуть, такожде клетва да ѥсть на нихь и да се изьжденуть биюке и ѡсрамокени. На людехь црьквныхь црьква да узмма торовштяау и травнину. И чловѣку црьквеному прѣстои .иι. динарь. Всаку глобу да узима црьква на своихь людехь: ѡть .ѕ. воловь .г. перпере. И безь суда да се не изводи црьквни чловѣкь изь црьквнаго села. И аште го позове инамо кто на судь, да му ѥсть прѣстои .иι. динарь. И што присели кои либо игумень свѡбодьна, кои му законь упише, да стои на томь, да си не потвара записаныѥ. Ако самохотию кто узлюби црьквь и придеть, да ѥсть ть чловѣкь свободнь ѡть всѣхь работь кралѥвства ми, развѣ црькви бѣдбу .г. дьни у годишти. И колици се обрѣтають Власи у светаго Геѡргиιа, да имь ѥсть законь светаго Симеона и светаго Саве, што и Милешевьскимь Влахомь и Студеничьскимь. И да ѡру дьнь бѣдбе, и што поѡру, тако и да пожню„ и сѣно да косе ѡть круга козь. И Хранча по тьстнинѣ ѡблюби црькву, да ѥсть црьквни воиникь у законь светаго Симеона и светаю Савы, и да имь се кони не товаре и товара да не воде. И попов`сци синове кои книгу не изуче, да су сокалници а да се не померопше. И да кралѥвство ми Добрька сь братомь Драгоутиномь, да ста сокалника светому Геѡргию. И панагюрь, прѣжде учреждены светымь Романомь царемь, да стаѥ ноембра .к., да си ставе настоѥштии игумениѥ где имь ѥсть хотѣниѥ, и да га беру црькви .и. дьни. И всаки кто приходи на нь, любо Грькь или Бльгаринь или Срьбинь, Латинь, Арбанасинь, Влахь, да дава законую царину ιакоже у Хтѣтовои и у Грачаници и по всѣхь црьквахь инихь. И кефалиιа да не метеха на панагюри ни свезати, ни доходка узети коѥго любо, ни кои владальць, нь самь игумнь да ѥсть кефалиιа панагюру. И всаку глобу узимати и всаки дохѡдькь што се учини на томь панагюри, то все да узима црьквь, а ѡть вражде половину. А вьзбраниви царину или украдь или прѣтворива сиιа више писаннаιа, да му ѥсть мьстникь свети Геѡргиѥ зде и вь придуштимь вѣцѣ, и да му ѥсть вь бранѥхь вь мѣсто помошти супостать, а такови да плати .р. перперь. Вѣдомо боуди ιако изнесе прѣдь кралѥвьство ми архимоудрить Никодимь записаниιа и хрисовоуле светыхь и правовѣрнихь царь и краль вишеписанихь и видѣ кралѥвьство ми записаниιа ихь и хрисовоуле ѡбетшавшеѥ ѡть многыхь лѣть, молми изгрьзене, изьмнеме, издрьте, ιако не мошти к` томоу проч`тати се, и благоволихь ѡ нихь, и оумоль чьстнаго игоумена светыѥ Богородице Лаври Стоуденичьскиѥ Савоу и Николоу Ѡпарешоу и диιака кралѥвьства ми Дабишоу, емоуже рече кралѥвьство ми та вса своѥю роукою исписати и прѣложити ветха писаниιа ѡть грьчьскыхь и бльгарьскыхь хрисовоульь, исписати тѣхь всѣхь ветхыхь на сии новыи хрисовоуль. Сиιа вса дарованнаιа светыми и правѡвѣрними цари и кралии, и приложена кралѥвьствомь ми, и дорованаιа(!) ѡть прочихь властельь оу помень, или за гробь, или харизмо, та вса да дрьжи светы Геѡргиιе Горга и побѣдоносць вь бранѥхь, и вь нѥмь настоѥштии чьстны архимоудрити, ѡбыавлѥниѥмь сего хрιсовоула, понѥже да га има кралѥвьство ми ходатаіа и помоштника вь напастхь и ратехь, ибо вь многыхь прискрьбныхь мѣстехь помоштникь теплы ѡбрѣте се кралѥвьствоу ми. И ѡть работникь кралтевства ми, посилаѥмыхь по вса врѣмена по жупахь и по градѣхь кралѥвства ми брати и вьспримати что, да не улазеть ни забавлιають ни да пакостеть метохыιамь и селомь ни людемь светаго Геѡргиιа. И кои су по жупахь кралѥвства ми ни да метехають правинамь светаго Геѡргиιа Горга и Побѣдоносца вь бранѥхь, ни практорь ни кнезь ни севасть ни винарь ни комись ни страторь ни позобь ни изгончиιа граду ни письць ни волоберь ни аподохиιарь ни геракарь ни псарь ни десеткарь пчелны, ни десетка овчега ни травнине ви слоновштине ни комоди ни митате ни наметка житнаго ни винога ни месного ни сирного, ни чловѣка гарепсати ни конιа ни вола ни ѡсла ни ино что. Благоволѥниѥмь кралѥвства ми вса проста и освобождена вь вѣчну свободу светому Геѡргию Горгу и Побѣдоносьцу вь бранѥхь. И то все милостию кралѥвства ми повелѣхь вѣчно записати у хрисовуль сιи, ιако да никто же ѡть таковыхь да не смѣѥть вьлѣсти вь люди светаго Геѡргиιа Скопского, ни ино что поѥти на всакии работи кралѥвства ми, да ѥ свободно и утврьждено подарованиѥмь сего хрисовула донде сльнце на землю сиιаѥть. И по смрти кралѥвства ми кого Богь изволить и поставить ѥго на столѣ кралѥвства ми, или сынь кралѥвства ми или унукь, или кто годѣ ѡть суродникь кралѥвства ми, да не разорить ни попереть сего хрιсовула, нь паче да дароуѥть и понавлιаѥть, ιакоже ѥсть лѣпо и прилежно творити светымь и правовѣрнимь царемь и кралѥмь. Кто ли се обреште ухиштрениѥмь диιаволимь прѣтворивь едину чрьту ѡть сихь више писанихь у семь хрисовулѣ, того да искусить Госпѡдь Богь праведнимь судомь своимь вь симь вѣцѣ и вь боудоуштемь, и да (ѥсть) проклеть ѡть Господа Бога вседрьжителιа и ѡть светыѥ Троице, ѡтьца и Сына и Светаго доуха, и пречистиѥ ѥго матере Богородице, и сило(!) чьстьнаго и животворештаго Крьста, светыхь беспльтныхь сильь, и светаго Предьтече и Крьстителιа Іѡан`на, и светыхь .д.-ыхь еуаггелисть, и ѡть .вι. врьховныхь апостоль и ѡть .тиι. светыхь ѡтьцьь никеискыхь, и ѡть всѣхь апостоль и пророкьь и моученикьь и светительь и постникьь, и сихь правовѣрныхь царьь и кральь више писаныхь, и, аште и грѣшно ѥсть кралѥвьство ми, и ѡть кралѥвьства ми да ѥст` анадема, и да ѥсть причестникь ѡтврьгшихь се Христа Арии и Несторию и Юдѣ продателю (!), и рекшихь „Крьвь ѥго на нась и на чедѣхь нашихь“. А ѡть таковихь да приметь гнѣвь и наказаниѥ ѡть кралѥвства ми и да плати у царину .ф. перперь. А людиѥ црьковны да работають у законь светаго Сѵмеона и светаго Савы. Вь лѣто .҂ѕ. .ѡ. .и.