†Пѡнеже бы(сть) хрисовȣль ц(а)р(ь)ства ми молѥниꙗмь прѣвисокого крал(ꙗ), любовнога с(ы)на и ꙁета ц(а)р(ь)ства ми, ѡ приложени ѥже вь Скопи цр(ь)ква С(ве)т(а)го м(ȣ)ч(е)ника Никити вь метохию. Ȣ томь Скопии дрȣгаꙗ цр(ь)к(в)и на име С(ве)тиѥ Б(огороди)це, Боришичина, с людми что се ѡбр[ѣ]таю по(дь) номь и сь нивами и сь виногради. И дрȣгаꙗ цр(ь)ква кою ѥс(ть) подвигнȣль тьи самь крал(ь) Иѡана Кр(ь)ст(ите)лꙗ. И дрȣга метохиꙗ и села и ꙁемлѥ иже сȣ нареч(е)на именемь сице: село Банꙗне, прониꙗ сь всѣми правинами ѥго. И ꙁемлꙗ нарекомаꙗ Прѣбȣжда: и починаѥть ѡт пȣти банꙗньскога и идеть кь градȣ Скопьскомȣ, и до гдѣ се ꙁове Често Мрамѡриѥ, и ѡпира се ȣ рѣкȣ ȣ Лепеньць и кладенца Голишева, и до мѣста нарекомаго Желѣꙁнаго, с периволми ѥго и с водѣничиѥмь и с прочими правинами, ꙗкоже го ѥс(ть) дрьжаль дрѣвлѥ нѣкто Жегрь Радомирь сь братиꙗми. И ȣ Полоꙁѣ село Нераща с правинами ѥгѡ. И дрȣго мѣсто нареч(е)но Радѣѥво с виногради и с водѣничиѥмь и с дворомь, ѥже ѥс(ть) дрьжаль нѣкто Братиславь. И дрȣга цр(ь)к(о)вь С(ве)т(а)го Николи ѡбрѣтающи се вь намѣсти Любѣни, с виногради и сь водѣничиѥмь и прочего намѣстиꙗ еже вь ѡбласти ѥг(о). И дрȣго мѣсто Добри (crossed out: добри) Доль: ѡпираѥть до Радȣше, с нивиѥмь ѥже .Н. вретень, еже ѥс(ть) кȣпила Боришица. Дрȣго мѣсто Винища ѡпирающи до брѣга Селкова. И дрȣгоѥ мѣсто нареч(е)н'ноѥ Дол'нꙗꙗ Чрьмница ѡпирающи до кладенца [ѥже ѥсть] тȣ. И дрȣгоѥ мѣсто нареч(е)ноѥ Дол'неѥ Кȣч'ково, с правинами ѥго. И дрȣгоѥ мѣсто нареч(е)ноѥ Апокавково, ѡпирающи до кр(ь)ста. Такожде и ȣ Блатѣ ȣ Лисичахь нѣколикѡ нивиꙗ блиꙁь правинь Каломеновѣхь; и виногра(да) два, ѥдинь о(у) Побожди а дрȣгы ȣ долȣ Пȣрешевѣ. И дрȣгаꙗ села пристȣпивша кь тои цр(ь)кви поданиѥмь любовнога свата ц(а)р(ь)ства ми пасинька прѣвисокога крал(ꙗ) и любовнога с(ы)на и ꙁети ц(а)р(ь)ства ми, иже нареч(е)ноѥ село Лопȣшани с правинами ѥго. И поль села Кл[ьче]вища и катȣнь Влахь С(ве)т(а)го Никите. И село ȣ Моравѣ нарекомоѥ Иꙁмира. Планина Люботѣнь сь ѡбластиѥм (sic) си. И др[ȣга план]ина Плась сь ѡбластиѡм си. Дрȣꙁѣ двѣ планинѣ нарекомѣи Сощнѣ. И ȣ Скопи ѡт трех трьговь ц(а)рина на всако лѣто, на Просвѣщениѥ ѥгда ѥст(ь) праꙁникь цр'квни. И пакь ȣмолы ц(а)р(ь)ство ми прѣвисоки крал(ь) и любовни с(ы)нь и ꙁеть ц(а)р(ь)ства ми, да бȣде дрȣгы хрисовȣль ц(а)р(ь)ства ми, ꙗко да ѥс(ть) та цр'ква С(ве)т(а)го Никити сь всомь ѡбластию своѡмь вь ѡбласть и вь метохию с(ве)тогорьскои цр(ь)кви, ѥже ѥс(ть) сьдаль прѣвисоки крал(ь) и любовни с(ы)нь и ꙁеть ц(а)р(ь)ства ми на име Вл(а)д(ы)кы и Сп(а)са Х(ри)с(т)а вьшьдшаго на Н(е)б(е)са, на мѣстѣ нарекомѣмь Х[рȣс]иꙗ ѥже вь Пиргȣ. И ѡще да имать та цр(ь)к(в)и ѥже ѡт нѥго дарован'на сьги села: село нарекомоѥ Блат'це, ѥже ѥс(ть) надь С(ве)тимь Никитою сь всѣми правинами ѥго; и дрȣго село Глȣси под цр(ь)квомь, сь млини и сь прочими правинами ѥго. И воиникь кои ѥ тȣ нарекоми Геѡр(ь)гиѥ Репана. Молѥниꙗ рад(и) прѣвисокаго крал(ꙗ) и ꙁета ц(а)р(ь)ства ми, сии хрисовȣль пода ц(а)р(ь)ство ми повелѣвать, да ѥ цр'ква С(ве)т(а)го Никите с правинами своими по рȣкȣ цр'кве Г(оспод)а Сп(а)са нашего Ис(ѹса) Х(ри)с(т)а еже вь С(ве)т(ѣи Горѣ] на мѣстѣ нарекомѣ ȣ Хрисиȣ пир'гȣ, и ѥдинь игȣмень да ѡблад(а) и цр'квами и сели и метохиꙗми и сь всаким дохѡдькомь. Тѣмже силою и крѣпостию сего хрȣсовȣла ц(а)р(ь)ства ми да бȣде подлагаѥма цр'ква С(ве)т(а)го Никити под цр'квȣ иже вь С(ве)тои Горѣ в Пир'гȣ и сь всѣми правинами его метохиꙗми ѥго и сели. И тако да бȣд(ȣт) свободни ѡт всакиѥ работе и ѡт всакого подан'ка, и никто да не има поискати или потькнȣти или ꙁабавити ꙗже има ѡт прьво цр(ь)к(в)и та и ꙗже ѥ сьди приложиль прѣвисоки крал(ь) и любовни с(ы)нь и ꙁеть ц(а)р(ь)ства ми, ѡ нем'же се и пѡдаде си хрисовȣль бити вь ȣтврьждениѥ. М(ѣ)с(е)ца маꙗ, ин'диктиѡ(нь) .Ѕ. вь лѣт(о) .Ѕ. Ѡ. ЅI.